---

Ongerscheidinge 2010

---

Rob Hermans Offesieër in de order van de Rog

---

Marc Gabriëls Offesieër in de orde van de Rog

Marc kriegtj de ongerscheiding umdet hae in 't verlde de Jeugdpreense en jeugdraod heef begeleidj, mér vuural umdet Marc 23 joar lang as artiest aan de Boonte Wichtermiddig mejgewerktj heef.

---

Irene Kunnen-Weerts, Ridderorde in de orde van de Rog

Vanwege de lange en groeëte inzet as artiest beej de Boonte Wichtermiddig

---

Rob Princen Ridderorde in de orde van de Rog

Vanwege de lange en groeëte inzet as artiest beej de Boonte Wichtermiddig

Erik Fikken ôngerscheide in de Ridderorde van de Rog

Dit vanwege zeen groeëte verdienste beej 't optrei-je in de Boonte Aovundj

Mieër foto's in de fotoalbum.

---

Orde van verdeenste SLV -
Samenwerkendeje Limburgse Vastelaovundjvereiniginge

Peter Nies

Peter ès lid vanaaf 1999. Hae ès binnegekaome as aktieve Vastelaovundjveerder van
de Kauvers. Ziên organizatoriese kwaliteite ligge vuueral in de kemmisie FOS
(Fieëst oppe Straot). ’t Regele en ‘t logestieke verhaol van oeëze Rogstaekersoptocht ès
altiêd ziên stokpaerdje gewaesj. Daonaeve ès Peter betrokke in de vergeu-j-ingekemmissie van oeëze Optocht.  Peter ès degene dae oppe memente det minse al aan ’t fieëste zeen toch nog
bieëzig kan zeen met de logestieke en praktiese aafhandeling van zake. Hae ès jaomer genôg
wat beperkdj in ziêne tiêd, want ’t ès un drök baasje. Vör al di-j 11 jaor inzet moog ’t SLV hem
dieës ôngerscheiding aanbeeje.

Paul Verscheijden

Ouch al zoeëne drök bezatte mins. Paul ès unne mins van neet kalle mer doon. neet lang
vergadere mer aanpakke. Hae hiêt lange tiêd de verantwoeërding gedrage vör ’t Boore Bal.
’t Zeûke nao geschikdje kandidate en vuueral de kombinasies dao-in moste in ziêne optiek good passe. Ziên begeleiding van ’t Boore gezelschap woor altiêd aaf. Daonaeve ès Paul de regelateur
van de optocht waat betreftj de podiumwages langs de kant en hiêt in de vergeu-j-inge
kemmissie un belangriêke taak. Kortum unne letterlikke dooner. Bovendien ès Paul de langste
uuet de klup dus asj aan keûmtj op ruuemdje make óf bestellinge ès Paul DE MÂN. Paul wille vae
as SLV dan ouch gaer ôngerscheide met dieës schoeën ôngerscheiding.

Thijs Vleeshouwers

11 jaor Lid. Ziên aktiviteite binne de organizasie van de Rogstaekers zeen eigelik tevöl um op te neûme. Nog altiêd ein van de kertrekkers van de gezet. Jaorelânk fanatieke en bevloeëge
begeleider van de Jeugd binne de Rogstaekers. Jeugdpreensebegeleider, sikkertaris van de kemmissie Jeugd, én de kemmissie Preense en Protokol. Sikkertaris van de Promskonzert-
werkgroep én sikkertaris van de PR. Nôw weer aktief as Preensebegeleider van oeëze Rogstaekersprins en de lieëst ès nog altiêd neet aaf. Kenmerkendj vör Thijs ès ziên neet
aaflaotendje enerzjie en ziên gezonde meneer um zake krities en zorgvuldig  aaf te waege.
Hae hiêt ouch un minpuntje….hae ziêt noeëts NEIN, én hae kan asj neet hiêlemaol good giêt,
zoeë lekker knoeëtere tiêge oeëze kanseleer.
Vör dieëze echte betrokke Rogstaeker un waalverdeendje SLV ôngerscheiding.

---

Orde van 't Kammeräödje vör Thieu Weekers

Foto's: Adrie Hendriks

Oppe Boonte Aovendj van 8 jannewari wuurdj Thieu Weekers de orde van ’t Kammeräödje opgespeldj. Thieu és zieëker geînen onbekindje inne Wieërter vastelaovendj. In 1975 waas hae as preens Thieu II Rogstaekerspreens. E jaor later woeërt hae lid vanne Rogstaekersvereiniging en daobinne hieëtte allerlej functies beklédj. Zoeë waas hae 12 jaor vuuërzitter vanne Boonte Aovendjkemissie en 8 jaor preensebegeleî-jer. Âl mét âl waas Thieu 20 jaor lid vanne Rogstaekers. Binne de Boonte Aovendjkemissie hieët hae o.a. mét groeët enthousiasme de kaartrizzervieëringe en zaalindaeling gedaon en det és gein gemaekelike klus.

Ouch  nao zien aafscheid as aktief lid koste de Rogstaekers e beroop op hem bliêve doon. Nog altiêd zörgtj hae vör de zaalindaeling vanne Boonte Aovendje, same mét zien vraw Paula.

In ’t Wieërter vereinigingslaeve és Thieu altiêd aktief gewaesj. Hae waas 10 jaor bestuurslid van Kerkelike Hermeni-j St. Joseph 1880, lid van sociëteit Amicitia, bestuurslid vanne Charitaswînkel en al 44 jaor vuuërzitter en spuuëler beej  ping-pongclub Old Stars. Eder waek gieëtte tennisse en kaarte mét zien kammeräöj.

Vanuut de Rogstaekers dreugtj Thieu de hoeëgste ongerscheî-jing, nl. Commandeur inne orde vanne Rog, és lid van Verdeenste, lid vanne Senaat en lid van verdeenste van de SLV. As kroeën op zien wêrk krieëg hae in 2000 ’n kuuëninklike ongerscheî-jing.
Vör âl ’t werk det Thieu Weekers gedaon hieët en oppe achtergroond nog altiêd deut és ’t V.V. de Rogstaekers ’n ieër um hem de Orde van ’t Kammeräödje tów te kinne.

"Orde van Verdeenste" vör Peter Princen.

Onlangs és doeër Vorst Jan van V.V. De Rogstaekers de "Orde van Verdeenste" uutgereiktj aan Peter Princen. Peter hieët zich ruum 11 jaor verdeênstelik gemaaktj beej de Stadsvastelaovendj vereiniging De Rogstaekers. In de beginjaore as sirremoniemeister, waas hae al gaw vuuërzitter van de kemissie FOS (Fieest oppee straot) en hae 'n groeet aantal jaore de îndj-verantwoeërding haaj beej de Groeëte Rogstaekersoptocht. Neet allein de Optochte vele ônger Peter zien verantwoeerding, ouch 't Boorebal, Toêt en Blaosfieëst en alle boête aktiviteiten haje zien aandacht.
Daonaeve waas Peter eine groeete enthozjasteling en uutveurder beej 't rejalizieere van de eige Kiosk. De Rogstaekers zeen Peter dao zieer dânkbaar vör en hebbe hem met recht  beneumdj tot "Lid van Verdeenste".

---

Ongerscheidinge 2008

Mies Grijmans, Ieerelid van de Bônte Aovundj Artieste

MIES BEDÂNKTJ

Nao mieer dan 30 jaor betrokke te zeen gewaesj beej de Bônte Aovundj van V.V. de Rogstaekers hieet Mies Grijmans op 12 jannewari j.l. vuuergood 't vuuerdook achter zich towgedaon.

Mies es in 1977 begonne inne Bônte Aovundj met ‘ne buut. Det 'n aantal jaore, woeenao hae vieja kleiner rölkes uuteindelik zien plaetske binne de Bônte Aovundj hieet wieete in te neme. En det dit neet zônger suukses es gewaesj es 'n eder, dae de vörbeeje jaore de Bônte Aovundj hieet bezochtj, bekindj. Dînktj in det verbând mer aan zien rol as îngelke hangendje inne locht, as ridder, beej de schötteri-j, as schoeenvader vanne broêd en zoee zeen d'r de aafgeloupe jaore nog völ mieer krejâsies gewaesj di-j Mies hebbe gemaaktj tot ‘ne artiest “pur sang”.

Nôw Mies es gestoptj met de Bônte Aovundj beteikent e.e.a. oeeveriges neet det hae hieelemaol verloeere es vör oeeze Wieerter vastelaovundj. Mies zal – op de vör ‘m kinmêrkendje meneer en met de noeedige knauwel – op vastelaovundjzôndig zien “act” op blieve veure in oeeze groeete Rogstaekersoptocht. Vae hoeepe det hae det nog lang zal bliêve doon.

Mies, ‘ne dikke mersie vör al di-j schoeen Bônte Aovundj memênte!!!!!

Rob Vaessen, Groeet Offeseer in de Orde van de Rog

Vuuëraafgaondj aan de Bônte Aovundj van zaoterdig 12 jannewari és doeër Vorst Jan de “Groeët Offeseer in de Orde van de Rog” uutgereiktj aan Rob Vaessen .

Rob és lid van de vereiniging vanaaf 1987 en hieët in di-j hoedanigheid völ funksies beklédj. Van 1988 tot 1997 maakdje Rob dael uut van de kemissie LOP (Lôl oppe Plénk) en waas al di-j jaore vuuerzitter en daomej verantwoeërdelik vör de Bônte Aovundje. In 1999 noom hae 't Sirremoniemeisterschap op zich, 'n taak di-j hae met völ oeëvergave beklédje.

Ouch in 't begeleiden van de nôwwe Rogstaekerspreens és 'n taak woeë Rob zich hieëlemaol in kân uutlaeve. Sinds 2007 és Rob 1e sikkertaris binne de vereiniging, 'n taak di-j hieël wat uurkes van ziene vreeje tiêd opsloktj. Beej dit alles és Rob naoteurlik 'ne vastelaovundjveerder dae 't hért oppe gooj plaats hieët zitte en dieës Orde met ieëre moog drage.

Anton Moonen, Groeet Offeseer in de Orde van de Rog

Op de Bônte Aovundj van vriêdig 11 jannewari és doeër Vorst Jan de "Groeët Offeseer in de Orde van de Rog" uutgereiktj aan Anton Moonen. Dit vör zien groeëte verdeenste vör de vastelaovundj in z'n algemein en de Rogstaekers in 't bezûndjer. Anton és al vanaaf 1985 betrokke beej de Bônte Aovundje en stieët daomej dit jaor vör de 22e kieër oppe plénk van 't Munttheater.

Doeër de jaore hieën hieët hae zich ontwikkeldj tot 'ne rasartiest en és vuuëral gekindj doeër ziene fantastiese mimiek. Doeër zien ervaring hieët hae in de Bônte Aovundje völ aandacht vör 't totaalplaetje.

In 2000 kreeg Anton dan ouch vör al zien verdeenste de Zilveren Buut uutgereikt van de SLV. (Samewerkende Limburgse Vastelaovesverenigingen) Naeve de Bônte Aovundje dreugtj Anton ouch zien steinke beej aan de uutveuring van de Rogstaekerslegende op de Elfdje van de Elfdje en deut al jaore same met de Geknakdje Stieël mej aan de Groeëte Optocht en 't Toêt en Blaosfieëst. Um kort te gaon, Anton és met recht 'ne vastelaovundveerder dae dieës ongerscheiding verdeend.

De Opstaeker vör Mark Welten van ´t Wêrkmeisters Gilde

Kanselier Peter speltj de Opstaeker op

Zilvere Buut van ´t SLV vör Peter Beelen

Peter met zien vrâw Anita

Peter organizieërdj al bekans 10 jaor de Boonte Aovundje van de Rogstaekers. Un taak woeë weinig minse eigelik van wieëte wi-j drök det eigelik ès en woeë dejje allemaol aan motj deenke en vör moogtj zörge. Krejatief minse begeleide en zörge vör vuuerwaarde det ze dit in un prettige ambiance good kunne invölle ès al un hiël opgaaf.

As dejje det ouch met plezeer dootj en det ouch nog uuetstraoltj es det opzichzelf al un verdeenste. Peter ès de mins van de kommunikasie tösse hiëlvöl verschillendje perti-jje. De schrieëvers-artieste en de regisseur, de klei-jermaaksters en décorbouwers, de direksie en ‘t technisch persenieël van 't Munttejater.

Hae ès de organizatoriese spil in de totstândkaoming van dieës 10 uutverkochdje aovundje. De vuuerrizzervieëringe, de aandacht vör unne gezellig artieste kefee. Hae hieët groeët respekt vör de betrokke minse van de Boonte Aovundj en det leûtj hae vuueral zeen doeër “oug” te hebbe vör detail.

Daonaeve woor Peter tot vuuer kort de vuuerzitter van de Kemmissie Lôl oppe Plênk. Heej-in hieëtte ouch altiêd un echte vuuertrekkersrol ingevöldj. Un Pietje Presies asj um drej-beûk en aksielieëste gieët. Umdette zelf zoeë gedrieëve woor moste ânger ouch nog wul ‘s un “tendje beejzette” in zien kemmissie. Mer waal altieëd in un gooj sfeer. Kortom eme dae vör 't kulturele erfgoed “De Rogstaekers Boonte Aovundje” as ouch in de totale Rogstaekers Vastelaovundj unne hieële belangrieëke schakel ès en vuueral gewardieërdj weûrdj. In dae zeen ès 't dan ouch gemaekelik te verklaore det Peter Beelen met recht de Zilveren Buut hieët ontvânge.

Orde van verdeenste SLV -
Samenwerkendeje Limburgse Vastelaovundjvereiniginge

Paul Gielis

Paul Gielis Lid van Verdeenste SLV

Dieëze mins moog leiding gaeve aan de Spesjaal Aktiviteite Kemmissie (SAK). Hae deût det met zoeëvöl enerzjie det de ânger lede neet de tiêd krieëge um nao- laot staon met- te dînke. Unne mins dae 't zakelikke karakter van de Vereiniging vertieëgewoeërdigdj.

Neet lang kalle mer doon, aksies uutzette en det met ziêne spesjale humor. Altiêd in vör ‘t verbale “leste woeërd”. Neet te vânge op verspraekinge want hae drejdj 't zoeë dette toch geliêk hieët of kriêgtj. Eme dae unne hieële daag beej Boels nao de nôw ontwikkelinge van twaletwages kan gaon kieke. In dae zeen dus ouch de groeëte man achter de rejaliezasie van 't nog altieëd noeëdige Rogstaekers paveljoen. Van keetering tot twaletwage Paul wetj oeëveral van en regeltj alles.Hae hieët al înkel hieël groeëte projekte vör de Rogstaekers nieërgezatte en daorum 'n terechte wardieëring vör Paul Gielis.

v.l.n.r.:Peter Princen, Roger Jansen en Rolf Bonten

Peter Princen Lid van Verdeenste SLV

Peter ès unne groeëte in letterlikke en figuurlikke zeen aanwieëzige mins beej de Rogstaekers. Vanaaf 't begîn hieëtte zich vuueral ingezatte in de totstândkaoming van unne good georganiezieërdje Optocht. Bevloeëge in doon en laote en soms letterlik haard rennendj doeër dae optocht um 't allamaol in gooj bane te leide. Daonaeve èsse de initiator en vuuerman gewaesj in de rejaliezasie van de kiosk. Dieës uuetbreiding aan ‘t “wagepark” van de Rogstaekers ès letterlik ônger ziên leiding tot stând gekaome. Ouch beej de tot stândkaoming van 't paveljoen weûrdj gebroeëk gemaaktj van de vuueral techniese vaardighede van Peter. Peter ès en zal altiêd unne kritiese man bliëve dae soms op un impulsieve meneer uuting guftj aan z'n geveûl. Kortom emes dae ondanks ziên drökke werkzaamhede tiêd wiltj vreejmake vör de schoeën Rogstaekers zaak.

Roger Jansen Lid van Verdeenste SLV

Unne veelzijdige organizator dae van alles e bitje wedj, en daodoeër ouch al op völ verschillendje plaatse in de vereiniging zien steinke hieët beejgedrage. Roger ès unne man van grappe en grolle en zuuet 't rillatieve van alles gaer en good in. Lutj zich neet gek make in drökke en spannendje umstandighede. Hultj good oeëverzicht en kan minse entoezjasmieëre. Det opzichzelf ès al un kunst. As vuuerzitter van de Jeugdkemmissie geuftj hae leiding aan ein van de mieëst belangriêke kemmissies van de Vereiniging. 'n groeet aantal jaore (mede) verantwoeerdelik gewaesj v'r 't waalslage vanne Bônte Wichtermiddige as organisator mer ouch as schriêver. Verder és hae mede initiator tot 't opzette van 'n Middelbare schoeëlefieëst. Hae werktj vör ôs aan de toekomst vanne Rogstaekers Vastelaovundj

Rolf Bonten Lid van Verdeenste SLV

Rolf ès un röstig Rogstaekerslid. Hae ès in de uutvuuëring van aktiviteite konsekwênt en duudelik in ziêne aanpak. Hae hieët al op verschillendje plekke in kemissies en in 't Besteur funksies vervöltj. Kenmerkendj in Rolf ès zien groeët analieties vermoge. Zake op un röstige meneer aankaarte zônger zelf dao hieël drök oeëver te doon. Hae woor aktief in de opzet van de Wichteroptocht en nôw de Wichter Boonte middig. Hae kan minse motivieëre um d'r wat schoeëns van te make. Rolf spuueltj ouch un belangriêke rol in de finasjele kemissie. Ondanks de drökke baan zuktj Rolf nao wieëge um ziên aandeil in de Rogstaekers Vastelaovundj gestalte te gaeve. Rolf kintj völ minse di-j sponser zeen vör de Rogstaekers of wille waere. Dao-in kan hae zich ôngerscheide van ânger Lede. Dit pozitieve bieëldj ôngerhultj Rolf op ziên eige meneer.

Vriëdig 4 jannewari heef vuuëraafgaondj aan de Bônte Aovundj mevraw May van Wegberg – Hanssen de ongerschei-jing 't Kammeräötje uut hâng van Vorst Jan ontvângen.

May ontvingtj dieës ongerschei-jing umdet ze vuuërâl oppe achtergrônd bêrge wêrk verzet um de Jeugd van V.V. De Rogstaekers, zoeë-as dao zeen de Jeugdraod van Elf, de adjedântjes en de Jeugdpreens eder jaor weer perfekt in de klei-jer te zette.

Daonaeve verzörgtj en ôngerhultj ze al mieër as 20 jaor dieës klei-jer, 'n taak di-j völ tiêd en enerzjie kôsj.

Neet allein beej de jeugd verzörgtj ze de klei-jer, naeve 'n aantal ânger damus van de lede van V.V. De Rogstaekers hieët May völ tiêd gestoeëke in de krejâsies van en vör de Täötebelle.

De Orde van 't Kammeräötje weurtj mér eine kieër per jaor uutgereiktj aan 'n persoeën of groep dae zich jaorelânk gehieël belangeloos inzetj vör de Rogstaekers of vör de vastelaovundj algemein. Dieës ongerscheiding weurtj dit jaor vör de 17 e kieër uutgereiktj. De Kammeräötjesdragers van vuuërgaondje jaore zulle aanwieëzig zeen tiêdus de oeëverhandiging en zulle May dan ouch opneme in dit illustere gezelschap.

Op donderdig 3 jannewari és vuuëraafgaondj aan de Bônte Aovundje aan de hieëre Frans Adriaens en Wil van Geldorp de hoeëgste Rogstaekersongerscheiding de “Kommandeur in de Orde van de Rog” doeër Vorst Jan en Kanselier Peter uutgereiktj.

Dit vanwieëge eur verdeenste, ongersteuning en groeëte inzet beej met name de Bônte Wichtermiddig van V.V. De Rogstaekers.
Nao de loupbaan van dieës hieëre as schriêvers en artieste van de Bônte Aovundj hebbe ze nog jaorelânk de regie geveurdj in de Bônte Wichtermiddig. 'n Taak di-j ze same met de wichtermiddig artieste met völ enthosjasme hebbe ingevöldj.

Nao 't aafscheid as regisseurs zeen ze nog înkel jaore betrokke geblieëve in de rol van soufleur, ouch heej aan hebbe op eur eige meneer 'n fantastiese invölling gegaeve. Vör dit “oeuvre”-wêrk zeen ze dan ouch met recht gewaardieërdj doeër V.V. de Rogstaekers.

Ongerscheidinge 2007

Zulvere Buut vör Nicole Kellenaers en Jan van de Port

Vuuëraafgaondj aan de Bônte Aovundj van maondjig 15 jannewari j.l. és de Zulvere Buut names de Samewirkende Limburgse Vastelaovesvereniginge (SLV) uutgereiktj aan Nicole Kellenaers en Jan van de Port.

Nicole Kellenaers és in 1988 begonne as grimeuse beej de Bônte Aovundj, en vanaaf dae tieëd ging 't ouch metein um 'n mieer professjoneel meneer van grimieëre. Neet allein vör de Bônte Aovundj verzörgdje Nicole de grime, mer ouch vör oeës Bônte Wichtermidige.

Verder waas Nicole neet verlaege um ouch nog effe 't noeëdige verstelwêrk aan de klei-jer van de artieste te verzörge en indeen noeëdig waas 't altieëd op zeuk nao di-j attribuute di-j iets spesjaals towveugdje aan 't totaalplaetje oppe buun. Nicole Kellenaers waas gekindj as 't maegdje det 't leefste op de achtergrônd bleef.

Met 't boeëvestaondje verdeentj 't met recht de Zulvere Buut, 'n ôngerscheiding di-j Nicole met ieëre tówkeumtj.

Zulvere Buut van SLV vör Jan van de Port

©Foto´s: Eric Wuisman

Jan maaktj al vanaaf 1988 dael uut van 't Wêrkmeistersgilde, 'ne groep haarde wêrkers di-j tiedus de Bônte Aovundje konstânt in de weer zeen um de dekórs op de zjuuste plaats te zette. Neet allein és Jan ein van de kértrekkers beej de Bônte Aovundje, ouch as d'r hölp gevraogdj weurtj beej al di-j ânger aktiviteite doeër de Rogstaekers geörganizieërdj, és Jan ein van di-j minse di-j altieëd klaor staon. Of 't nöw gieët um 't begeleiden van de optocht, 't inrichten van 't Fieëstpaviljoen of 't opbawwe van de kiosk, Jan és altieëd bereidj um dao aan mej te wêrke.

Gezeen 't boeëvestaondje verdeentj ouch Jan met recht de Zulvere Buut, 'n ôngerscheiding di-j um met ieëre tówkeumtj.

Aan 't îndj van de 10e en letste Bônte Aovundj van zaoterdig 20 jannewari 2007hieët Vorst Jan, Dorus van den Bosch, as dânk vör zien verdeenste aan de Bônte Aovundj van De Rogstaekers, beneumtj tot Ieërelid van de Bônte Aovundj.

Dorus dae as regisseur aafscheid neemtj, és vanaaf 1996 beej de Bônte Aovundje betrokke, ieërst as schriêver, daonao schriêver/ artiest en vanaaf 2002 as regisseur. Daonaeve waas hae ouch de driêvendje kracht um nów elemênte aan dieës aovundje tów te veuge, dînktj daobeej aan de video bieëldje en de gedichte.

Ônger de bezelendje leiding van Dorus hieët de Bônte Aovundj d'r blieëk van gegaeve nog altieëd 'n suukses te zeen, neet allein binne de Wieërter vastelaovundj mer zieëker ouch in 't Limburgse.

Groeët Offeseer in de Orde van de Rog vör Jacomien Coumans.

Vuuëraafgaondj aan de Bônte Aovundj van vriêdig 19 jannewari 2007 és doeër Vorst Jan de Groeët Offeseer in de Orde van de Rog uutgereiktj aan Jacomien Coumans. Dit vör eur groeëte verdeenste aan de Wieërter vastelaovundj en aan de Rogstaekers in 't bezûndjer.

Jacomien hieët van 1972 tot 1996 achter de schêrme gewêrktj beej de Bônt Aovundje as schmînkster en zoeë aaf en tów spuuëldje ze zêlfs mej in de Bônte Aovundje. Daonaeve waas Jacomien 11 jaor lânk de begeleidster van de befaamdje Huppelpupkes. 'ne Maegtjes sjoowgroep woeë-beej ouch de dochters Cindy en Carmen van dael uutmaakdje en in de jaore '70 en '80 neet wegk te dînke woore in de Wieërter Rogstaekers vastelaovundj.

Of dit alles nog neet genogt wêrk met eur mejbracht verzörgdje Jacomien in de jaore '90 ouch nog 's zés jaor lânk de klei-jing van de jeugdraod van elf, woeë-beej zoeën Ramache in 1991 en 1992 Jeugdpreens waas. Nów nog stieëds és Jacomien de driêvendje kracht achter eure mins Peter dae beej de Rogstaekers verschillendje funksies beklédj.

In 1989 kreeg Jacomien vör al eur verdeenste, vuuër, achter of op 't tonieël van de SLV (samewirkende Limburgse Vastelaovesverenigingen) de Zilveren Buut uutgereiktj.

Orde van 't Kammeräödje vör Mathieu Hoeben

©Foto's: Eric Wuisman

Vuuëraafgaondj aan de Bônte Aovundj van vriêdig 12 jannewari 2007 hieët Vorst Jan, aan Mathieu Houben as dânk vör zien verdeenste vör VV De Rogstaekers en in 't bezûndjer aan de Wieërter vastelaovundj de Orde van 't "Kammeräödje" uutgereiktj

Mathieu in 't dageliks laeve direkteur van de firma Intrak aan de Remundsjewieëg és eme dae neet gaer in de belangstelling stieët mer woeë vastelaovundjvereinigingen altieëd 'n beroop op kinne doon. Völ optochtdaelnemers wieëte de firma Intrak dan ouch te vînge.

Vanaaf de beginjaore 70 kunne groeëte en klein wagebawwers beej Mathieu terecht vör 't lieëne van 'ne traktor, dae dan dék nae înkel waeke weer ônger de konfettie weurdj trökgebrachtj. 'n Eder jaor wieër trökkieërendje aksie és det de firma Intrak op vastelaovundj-zôndig met 'n aantal schoeën gepoetsje en aafgeténkdje trekkers klaor stieët langs de optochtroute um de gestrândje of de met pech hebbendje daelnemers weer op de wieëg te hêlpe.

Daonaeve hieët de firma Intrak 22 jaor ôngerdaak geboeëje aan Vastelaovundjgroep De Joekels, di-j in eur hoeëgtijdage mér leefst 4 kieër de Gouwe Rog wiste te winne. Jaorelânk stong ouch op zôndigmêrge de vrachtwage met kraan klaor um verschillendje groeëte wages te hêlpe met opbawwe van eur krejâsie. Dit alles same maaktj 't det Mathieu met recht 'n "Kammeräödje" van de Wieërter Rogstaekersvastelaovundj geneumdj moog waere.

Ridder orde vör Thieu Verkennis

Foto: Harry van Son

14 jannewari 2007

Op ´t 4x11 jaorig Jubileum van de Brökwachters es aaftrei-jend vorst Thieu Verkennis ongerschei-je met ´ne Ridder vanne Rogstaekers vör zien grote verdeenste vör vastelaovundjvereiniging De Brökwachters.

Ongerscheidinge 2006

Commandeur in de Orde van de Rog vör Ad Jongen

Vuuëraafgaondj aan de Bônte Aovundj van vriêdig 20 jannewari 2006 hieët Vorst Jan de Commandeur in de Orde van de Rog uutgereiktj aan Ad Jongen. Dit vör Ad zien groeëte verdeenste vör de Wieërter vastelaovundj in 't algemein en de Rogstaekers in 't bezûndjer.

Ad Jongen és al vanaaf 1984 lid van de stadsvastelaovundjvereiniging en hieët in de aafgeloupe 22 jaor verschillendje funksies binne de Rogstaekers beklédj. Van 1987 tot 1995 waas hae besteurslid en 1e sikkertaris. Lange tieëd kwoom dan ouch alles op Ad nieër, of 't nów waas um 't adressebehieër, 't versteure van uutnuuëdiginge, 't bevestigen van aafspraoke of 't ôngerhaoje van kontakte van zoeë-waal zöstervereiniginge as de SLV vereinigingen, Ad zörgdje in dae tieëd det alles op rölkes leep.

Befaamdj wore ouch de zaoterdig vuuërmiddige as de lede van de Rogstaekers beej Ad toês op 't kantoeër um raod kwome vraoge, neet allein de lede van de vereiniging mer ouch ânger vrînde van de Wieërter vastelaovundj kwome geregeld beej Ad op de koffie.

Doeër de jaore hieën hieët Ad in verschillendje kemissies gezaete en dao zien verdeenste gatj, in 1983 zêlf Stadspreens van Wieërt wis hae van 1989 tot 1999 de zjuuste snaor te rake beej de vuuërbereidingen en begeleiden van nów Preense.

Verder hieët Ad in 't verlede de leiding op zich genoeëme beej de organizâsie van 't in Wieërt gehaoje Limburgs Vastelaovundj Leedjeskonkoer (LVK), beej de Gulden Humor en 't 6 x 11 jaorig bestaonsfieëst van de vereiniging. Ouch és Ad nog înkel jaore sikkertaris gewaesj beej de Samewirkende Limburgse Vastelaovundvereniginge (SLV).

Op dit momênt és Ad sikkertaris beej de Spesjaal Aktiviteiten kemissie (SAK) en vuuërzitter van de kemissie PR en véltj al 't drökwêrk en de vastelaovundjgezet ônger zien verantwoeërding. Nao dieëze vastelaovundj zal hae ouch weer zitting neme in 't besteur van V.V. De Rogstaekers.

©Foto's: Eric Wuisman

Vuuëraafgaondj aan de Bônte Aovundj van maondjig 16 jannewari 2006 és de Zulvere Buut names de Samewirkende Limburgse Vastelaovundvereniginge (SLV) uutgereiktj aan Jo van Geneijgen en Jan van Riet.

Jo van Geneijgen és waat dejje neumtj ‘ne Vastelaovundjveerder in hert en neere en lutj met name ziên muzikaal Vastelaovundjhert spraeke. Vanaaf 1995 es Jo aktief as litjesschriêver vör 't Wieërter Vastelaovundjlitjesfestival. De leste 2 jaor és hae dan ouch as winnaar uut de bös gekaome. Vuuërig jaor met 't litje “Mien vraw gezeen” en de schlager van dit jaor hieët as titel “Slup uut de boks”.

Ouch in de umliggendje plaatse es Jo bekindj as 't gieët um ziên Vastelaovundjschlagers. Zoeë hieët Jo al 'ne kieër 't litjesfestival in Stramproy gewonne en zêlfs 2 kieër in Ni-jwieërt.

Vanaaf 1988 es Jo ouch betrokke as schriêver en artiest met de “Lellebellies” beej de Bônte Aovundje van de Zweeloeëre op Luuëke.

Jo hieët op artistiek vlaak binne de Vastelaovundj z'n spoeëre zieëker verdeentj en és ein van di-j artistieke vreejwilligers dae de Wieërter Vastelaovundj op 'n positieve meneer uutdraagtj.

Zulvere Buut van de SLV vör Jan van Riet

©Foto's: Eric Wuisman

De Zulvere Buut waas verder ouch vör Jan van Riet en Jan maaktj al vanaaf 1995 dael uut van de groep dekórbawwers di-j 't eder jaor prestieëre um de schoeënste dekórs op de buun van 't Mûnttheater te zette. Jan hieët 't in zich um de ideje van de schriêvers en artieste te vertale nao 't plaetje oppe buun en kân vanuut zien kwaliteite as schilder 'n dekórstök tot laeve laote kaome.

Jan és ouch eme dae al mieër dan 20 jaor as zjurielid betrokke és beej de optochte van de Rogstaekers, in 't verleje hieët Jan zêlf mej gedaon met de Lapzwanse 1959 en met dieëze groep de mieëst uuteinloupendje krejasies gemaaktj.

Met 't boeëvestaondje verdeentj Jan met recht de Zulvere Buut, 'n ôngerscheiding di-j um met ieëre tówkeumtj.

Vuuëraafgaondj aan de Bônte Aovundj van vriêdig 13 jannewari 2006 és Peter van Akkerveken as dânk vör al zien verdeenste, ôngerschei-je met de “Orde van 't Kammeräödje”.

Peter és eme woeë de Rogstaekers altieëd 'n beroop op kunne doon en in zieëne vreeje tiêd hieët hae doeër de jaore meinig eurke gevöltj met Rogstaekersaktiviteite.

Of 't now gieët um ‘t verkoupe van ceedee's, 't verzörge van ‘ne mailing of penningeverkoup, beej Peter kloppe vae noeëts te vergaefs aan. Daonaeve es Peter aktief as zjurielid van de Wichteroptocht en de Groeëte Rogstaekersoptocht. Dit alles same maaktj det Peter met recht 'n Kammeräödje van de Wieërter Rogstaekersvastelaovundj geneumdj moog waere.

Op zôndig 13 november 2005 hieët Kanseleer Peter van Wegberg de Groeëtoffeseer in de Orde van de Rog moge ôntvânge.

Kanseleer Peter waas Jeugdpreens in 1965, Stadspreens in 1988 en es vanaaf 1989 lid van Vastelaovundjvereiniging De Rogstaekers. Hae hieët zich ôngermieër verdeenstelik gemaaktj v'r de Wieërter wichtervastelaovundj, woeëbeej hae 'n respektabel aantal jaore de kertrekker és gewaesj van o.a. de Wichtermiddig en 't zeuke en begeleide van ‘ne Jeugdpreens, Jeugdvorst en Jeugdraod. Verder és Peter diverse jaore de organisator gewaesj van 't boorebâl.

Vanaaf 1995 hieët hae de funksie van Kanseleer op zich genoeëme en dus ouch 't vieze vuuërzitterschap. Op dit memênt és de Kanseleer zieër aktief in 't interesieëre van stiepels (sponsore) v'r oeëze Wieërter Rogstaekersvastelaovundj.

Naodet Vorst Ton in 2003 aafscheid hieët genoeëme waas 't de taak van de Kanseleer um 't vuuërzitterschap tiêdelik oeëver te neme en op de wînkel te passe, det hieët hae met verve gedaon. Ônger de bezielendje leiding van de Kanseleer és 't gelökt um de vastelaovundjaktiviteite doêrgang te laote vînge in 'n groeët fieëstpaviljoen en bawdje de vereiniging 'ne eige kiosk.

©Foto's: Eric Wuisman

Opper-Opper Rogstaeker, Burgemeister van de gemeindje Wieërt
Mr. J.M.L. Niederer

©Foto's: Eric Wuisman

As in 1838 Hubertus Esser, mien oeëvergroeëtvader, nao Wieërt keumtj en dao 'n atelier vör kêrkelik edelsmieëdwêrk begintj zal hae as startendj ôngernemer noeëts gedachtj hebbe det dieës zaak zoeë lang zoeëj bestaon.

De léste 49 jaor heb ich 't roer van mien vuuërgêngers oeëvergenoeëme, jaomer genog és doeër de trökgânk in de Rooms Katholieke Kêrk dit wêrk tot e minimum bepêrktj.

Heb ich in de ieërste jaore nog völ kêrkwêrk gemaaktj, nao 't concilie van 1961 waas 't al gaw minder en bin ich mich gaon tówlegke op neet-kêrkelik wêrk.

As aafwisseling tösse al dieës sieraode és 't neteurlik heerlik um e groeët wêrkstök as de medâlie van de nówwe Vorst te ontwêrpe en te moge make. Toch mot ouch dit e seeraod zeen waat és aangepasj aan drager en funksie.

Alweer 'n aantal jaore hebbe de Rogstaekers 'n nów embleem op eur breefpepeer en dit ontwêrp met zien strakke liêne waas utermate geschiktj um d'r 'n tastbaar uutveuring van te make. Waat t'r wieter beej keumtj kieke és de naam van de Vorst dae 't gieët drage, 'n verwiêzing nao de plaats in de vôrm van 't gemeindjewaopen en neteurlik 't aod vertroedje Rogstaekersköpke van oeëze oeëverleje vrînd Dorus Rooymans.

't Resultaat és gewoeëre 'ne zulvere Rog met e liêf van titaan en daoboeëve drej gegravieërdje schîldjes met de betreffendje gravures.

Same met 't blawwig geoksidieërdje titanium en 't zulver kaome zoeë ouch de kluuëre van oeës Wieërter stadswaopen weer trök.

Foto's: Adrie Hendriks

Ich hoeëp det Vorst Jan dieës Keten met plezeer zal drage en det de Rogstaekers d'r gruuëts op zulle zeen. Ich heb dit in eder gevâl met völ plezeer gemaaktj.

Eloy Werz