Welkom

Leef Rogstaekers en Rogstaekerinnekes, leef vastelaovundjvrînde,

Vorst Jan

©Foto's: Adrie Hendriks

Ich bin zieër verieërtj det ich de Stadsvastelaovundjvereiniging De Rogstaekers vuuër moog gaon, neet allein as Vorst mer ouch nog as vuuërzitter en dao bin ich best 'n bitje gruuëts op.

't És neet oeëverdrieëve um te stelle det de Wieërter vastelaovundj good aangeschrieëve stieët in oeës Limburg. De aktiviteite waere good bezochtj. Oeës Bônte Aovundje zeen mer leefst tieën aovundje uutverkochtj en neet allein vanuut Limburg mer ouch vanuut alle daele van ‘t lând kaome massa's minse kieke nao oeëze fantastische groeëte optocht en mejfieëste op oeës bekindj en neet mieër weg te dînke Boorebâl.

Nog mieër aandacht zulle vae gaon bestieëje aan de groeëte en klein jeugd. 't Schoeëlefieëst és 'n now aktviteit en vae zeen êrg benoedj wi-j det gieët uutpakke. Hoeëpelik hebbe vae daomej weer e groeët jaorliks spektakel d'r beej. De wichteroptocht op maondjig weurtj wi-j langer wi-j mieër ‘ne famîlieoptocht en det bringtj ‘nen houp gezelligheid in de binnestad, neet te vergaete doeër de aansloêtendje famîliehosmiddig. Aan 't fepe met 't Toêt- en Blaosfieëst weurtj haard gewêrktj um dein en dânger nog groeëtser en gruuëtser te laote waere.

Oeës Rogstaekersstad zal 't kaomendj vastelaovundjsezoên weer dêndere van lôl en plezeer.

Vorst Jan en Jeugdvorst Sjoerd

De groeëte Preens en de Jeugdpreens zulle uch vuuërgaon in dit spektakel en d'r same met uch weer ‘ne spetterendje vastelaovundj van make. Nog wiêt ewég en nog neet tevöl aan dînke és de abdikâsie van dieës preense op de “aoje” Mêrrentj, ongetwiêfeldj weer 'n geweldjige happening.

Ich raeken d'r op dejje beej al oeës aktiviteite prezênt zultj zeen, mej zultj doon en mich zultj ongerstuuëne as Vorst Jan van de Rogstaekers.

Vorst Jan.